Gobi qo'llanmasi

Gobi — bog'chalar va o'quv markazlari uchun boshqaruv tizimi. Bir joyda: bolalar ro'yxati, guruhlar, davomat jurnali, ota-onalarning qarzi va to'lovlari, markazning xarajatlari va hisobotlari.

Har bir markazning o'z alohida manzili bo'ladi — masalan umka.gobi.uz. Sizning ma'lumotlaringizni boshqa markaz hech qachon ko'ra olmaydi.

Daftar va Excel o'rniga Gobi ishlatilganda eng katta foyda shu: qarzni siz emas, tizim hisoblaydi. Bolani guruhga qo'shasiz — qolgani avtomatik.

Xodimlar uchun

Brauzerga markazingiz manzilini yozing (masalan umka.gobi.uz), so'ng o'zingizga berilgan login va parolni kiriting. Login odatda ismingizdan olingan qisqa so'z bo'ladi — kamola kabi.

Ota-onalar uchun

Xuddi shu manzilda Ota-ona yorlig'ini tanlaydi va markaz bergan login kod bilan kiradi.

Til va rang

Yuqori o'ng burchakda til (o'zbekcha / ruscha / inglizcha) va kunduzgi–tungi rejim tugmalari bor. Tanlovingiz esda qoladi.

Markazni birinchi marta sozlayotgan bo'lsangiz, aynan shu tartibda yuring — har bir qadam o'zidan oldingisiga tayanadi.

1. Ta'rif yarating — ya'ni oylik narx (Sozlamalar → Ta'riflar). Ta'rifsiz guruh yaratib bo'lmaydi.
2. Tarbiyachilarni kiriting (Tarbiyachilar).
3. Guruh yarating — nomi, ta'rifi, dars kunlari va tarbiyachisi bilan (Guruhlar).
4. Bolalarni qo'shing (Bolalar → Yangi bola).
5. Bolani guruhga qo'shing, keyin Faollashtirish tugmasini bosing — shu paytdan pul hisoblana boshlaydi.
6. Har kuni davomat belgilang va to'lovlarni kiriting.

Ta'rif — bu narx shabloni. Bir marta yaratasiz, keyin uni bir nechta guruhga biriktirasiz. Narx o'zgarsa, ta'rifni tahrirlaysiz.

• Guruhlar uchun va to'garaklar uchun ta'riflar alohida turadi.
• Guruh yaratishda ta'rif tanlash majburiy — aks holda tizim qarzni nimadan hisoblashini bilmaydi.
• Ishlatilayotgan ta'rifni o'chirib bo'lmaydi. Avval guruhlarni boshqa ta'rifga o'tkazing.

Tarbiyachilar bo'limida dars beradigan xodimlar ro'yxati turadi. Har guruhga ikkitagacha asosiy tarbiyachi va yordamchilar biriktirish mumkin.

Tarbiyachiga tizimga kirish huquqi berish uchun uni Sozlamalar → Xodimlarbo'limida akkaunt sifatida qo'shasiz va Tarbiyachi rolini berasiz. Shunda u faqat o'ziga biriktirilgan guruhlarning davomatini yuritadi.

Guruh va to'garak — farqi nimada?

Ikkalasi ham bir xil ishlaydi: ta'rifi, jadvali, a'zolari, davomati va oylik to'lovi bor. Farqi faqat ma'noda — guruh asosiy mashg'ulot, to'garak qo'shimcha (shaxmat, ingliz tili va h.k.). Bola bir vaqtda faqat bitta guruhda bo'ladi, lekin to'garaklar soni cheklanmagan.

Guruh yaratishda so'raladigan narsalar

• Nomi va ta'rifi (narxi).
• Dars kunlari: toq kunlar (Du/Chor/Ju), juft kunlar (Se/Pay/Sha), dushanba–juma, dushanba–shanba, har kuni yoki o'zingiz tanlagan kunlar.
• Dars vaqti, xona va tarbiyachi(lar).
• Boshlanish va tugash sanasi. Tugash sanasi yaqinlashganda ro'yxatda ogohlantirish chiqadi va tugagach pul hisoblanmay qo'yadi — kursni uzaytirish mumkin.
• Teglar — o'zingiz o'ylab topgan belgilar ("ertalabki", "VIP") bo'yicha keyin filtr qilasiz.

Guruh sahifasi

Guruh nomini bossangiz ikki qismli sahifa ochiladi: chapda guruh ma'lumoti va bolalar ro'yxati, o'ngda davomat jurnali. Bolalar ro'yxatida holat rang bilan ko'rinadi:

• sariq — sinovda (hali faollashtirilmagan, pul hisoblanmaydi);
• yashil — faol, qarzi yo'q;
• qizil — faol, qarzi bor;
• kulrang — muzlatilgan.

Bolaning guruhdagi holati to'rt xil bo'ladi:

• Sinovda — endi qo'shildi. Davomat yuritiladi, lekin pul hisoblanmaydi. Bola bir-ikki kun kelib ko'rishi uchun.
• Faol — Faollashtirish bosilgan. Shu paytdan qarz yozila boshlaydi.
• Muzlatilgan — vaqtincha to'xtatilgan (kasal, ta'til). Davomat ham, pul ham to'xtaydi. Sababini yozib qo'yasiz.
• Arxivda — guruhdan chiqarilgan. Ma'lumot yo'qolmaydi, guruhning Arxiv bo'limida turadi.

Bola qo'shish

Bolalar → Yangi bola. Bolaning ismi va ota-onasining ismi kifoya; qolgan maydonlarni markaz o'zi tanlaydi (pastdagi Sozlamalar bo'limiga qarang).

Agar shu telefon raqami yoki shu ism + tug'ilgan sana bilan bola avval ro'yxatda bo'lgan bo'lsa, tizim ogohlantiradi va Eski profilni ochish yoki Baribir yangi qo'shish deb so'raydi — shunda bir oila ikki marta kiritilib qolmaydi.

Ro'yxat bilan ishlash

• Qidiruv bola ismi, ota-ona ismi va telefon raqami bo'yicha ishlaydi.
• Holat bo'yicha filtr: faol, sinovda, muzlatilgan, guruhsiz, arxivda.
• Ustunlar tugmasi bilan kerakli ustunlarni yoqasiz — tanlovingiz shu brauzerda esda qoladi.
• Excel tugmasi ekranda ko'rinib turgan ro'yxatni aynan o'sha filtrlar bilan yuklab beradi.

Bola profili

Ism ustiga bosilsa profil ochiladi. U yerda:

• bola va ota-ona ma'lumoti, ota-onaning login kodi;
• balansi — qizil bo'lsa qarzdor, yashil bo'lsa avans to'lagan;
• guruh va to'garaklari, ularni shu yerdan faollashtirish/muzlatish;
• tranzaksiya tarixi — har bir qarz va to'lov, kim va qachon kiritgani bilan. Har qatordan chek chop etsa bo'ladi;
• davomat tarixi.

Davomat guruh sahifasining o'ng tomonida — jadval ko'rinishida. Ustunlar dars kunlari, qatorlar bolalar. Katakka sichqoncha olib borilsa uchta tugma chiqadi:

• Keldi
• Kelmadi — sababsiz. Pul qaytarilmaydi.
• Sababli — kasallik va shunga o'xshash. Shu kun uchun pul qaytariladi.

Bosilgan tugmani yana bossangiz belgi olib tashlanadi.

Qoidalar

• Kelajakdagi sanaga davomat qo'yib bo'lmaydi.
• Tahrirlash muddati: joriy oy va o'tgan oyning oxirgi 5 kuni. Undan eskisi yopiladi — hisobot buzilmasligi uchun.
• Bayram (dam olish) kuniga davomat qo'yilmaydi.
• Muzlatilgan bolaga davomat yuritilmaydi.
• Kim belgilaydi: tarbiyachi faqat o'ziga biriktirilgan guruhlarga; rahbar va administrator hamma guruhga.

Bu qo'llanmaning eng muhim qismi. Gobi'da qarzni tizim o'zi yozadi, siz faqat to'lovni kiritasiz.

1. Qarz qachon yoziladi

• Faollashtirgan kuningizda — oyning qolgan darslariga proporsional. Masalan oylik 300 000 so'm, oyda 14 dars, siz oy o'rtasida faollashtirdingiz va 7 dars qoldi → 150 000 so'm yoziladi.
• Har oyning 1-sanasida — to'liq oylik summa, avtomatik, tunda. Hech kim hech nima bosishi shart emas.

2. Balans qanday chiqadi

Balans = yozilgan qarzlar − qabul qilingan to'lovlar

Bola profilida to'lov + yashil, qarz − qizil ko'rinadi. Ortiqcha to'lansa avans bo'lib turadi va keyingi oy qarzini o'zi yopadi.

3. Pul qachon qaytariladi

• Sababli kelmagan kun — o'sha bir kunlik narx qaytariladi.
• Bayram kuni — agar dam olish kunini qo'shishda "bola to'loviga ta'sir qiladi" belgilangan bo'lsa.
• Muzlatish va guruhdan chiqarish — o'sha oyda o'qilmay qolgan kunlar uchun. Buni tizim so'raydi: O'qilmagan kunlar uchun pul qaytarilsinmi? — belgilash o'zingizga havola.

Bunday qaytarishlar tarixda "Tizim" deb belgilanadi. Ular naqd pul emas — shunchaki bolaning qarzini kamaytiradi, shuning uchun kassaga tegmaydi.

4. To'lov kiritish

Moliya → To'lovlar yoki to'g'ridan-to'g'ri bola profilidagi To'lov tugmasi. Summani kiritasiz, usulini tanlaysiz (naqd, karta, o'tkazma) — tizim uni eng eski qarzdan boshlab o'zi taqsimlaydi.

Moliya bo'limi markazning butun pul harakati. Beshta yorliqdan iborat:

• Boshqaruv paneli — bugungi kirim-chiqim, oylik daromad va xarajat, sof foyda, jami qarzdorlik, kassa va bank qoldig'i. Ma'lumot jonli yangilanadi.
• Yechib olingan summalar — yozilgan qarzlar ro'yxati. Bu yerdan qo'lda qarz qo'shish, bekor qilish yoki qarzni kechirish (hisobdan chiqarish) mumkin.
• To'lovlar — qabul qilingan pullar, kim kiritgani bilan.
• Xarajatlar — oylik, ijara, kommunal, materiallar va boshqalar.
• Hisobotlar — daromad/xarajat, qarzdorlik yoshi (necha kundan beri to'lanmagan) va pul oqimi.

Har bir yorliqdagi ro'yxatni Excel'ga yuklab olish mumkin.

Hisobotlar bo'limi bolalar bo'yicha umumiy manzarani ko'rsatadi: nechta faol, sinovda, muzlatilgan, guruhsiz; oylar kesimida nechta bola qo'shildi va nechtasi ketdi; bitta boladan tushgan o'rtacha tushum.

Sozlamalar → Xodimlar. Bu yerda akkaunt yaratasiz va rol berasiz. Rol xodim nima qila olishini belgilaydi.

• Kompaniya egasi — hamma narsa. Bu akkauntni o'chirib bo'lmaydi.
• Administrator — bolalar, guruhlar, davomat, xodimlar.
• Tarbiyachi — faqat o'ziga biriktirilgan guruhlarning davomati.
• Buxgalter — moliya: hisob-fakturalar, to'lovlar, xarajatlar, hisobotlar.
• Filial direktori — bitta filialning ishi.

Tayyor rollar yetmasa, o'z rolingizni yaratib, har bir bo'lim uchun "ko'rish / qo'shish / tahrirlash / o'chirish" ruxsatlarini alohida belgilashingiz mumkin.

• Ta'riflar — narxlar.
• Teglar — guruh va bolalarga yopishtiriladigan belgilar, keyin ular bo'yicha filtr qilasiz.
• Sabablar — muzlatish va guruhdan chiqarish sabablarining tayyor ro'yxati. Har safar qo'lda yozib o'tirmaslik uchun.
• Dam olish kunlari — bayramlar. Ikkita belgisi bor: bolaning to'loviga ta'sir qiladimi va tarbiyachining oyligiga ta'sir qiladimi. Faqat kelasi sanalarni qo'shish mumkin, sana kelgach o'zgartirib bo'lmaydi.
• Bola maydonlari — bola qo'shishda qaysi maydonlar so'ralishi va qaysilari majburiy ekanini o'zingiz tanlaysiz (jinsi, manzil, telegram, pasport va h.k.).
• Bildirishnomalar — tizim ichidagi xabarlar.
• Arxiv — quyidagi bo'limga qarang.

Gobi'da hech narsa tasodifan yo'qolmaydi. O'chirish ikki bosqichda bo'ladi:

1. Oddiy o'chirish — profil Sozlamalar → Arxiv ga tushadi. Istagan paytda tiklaysiz.
2. Arxivdan o'chirish — profil butunlay o'chadi.

Ikkinchi qadamda ham to'lov va qarz yozuvlari o'chmaydi — moliya hisoboti buzilmasligi kerak. Agar bolaning pul tarixi bo'lsa, u yozuvlarda ism o'rniga "Profilsiz foydalanuvchi" deb qoladi, qolgan barcha shaxsiy ma'lumot o'chiriladi.

Shuning uchun oila keyin qaytib kelsa — u yangi mijoz sifatida kiritiladi, tizim "bu odam allaqachon bor" demaydi.

Guruhning ham o'z arxivi bor: guruhdan chiqarilgan bolalar o'sha yerda, davomat tarixi bilan turadi.

Ota-ona markaz manzilida Ota-ona yorlig'i orqali login kod bilan kiradi va faqat o'z bolasini ko'radi:

• balansi (qarzi yoki avansi);
• shu oydagi davomati.

Ota-ona hech narsani o'zgartira olmaydi va boshqa bolalarni ko'rmaydi.

Bolani o'chirsam to'lov tarixi yo'qoladimi?

Yo'q. Pul yozuvlari har doim saqlanadi, hisobot to'g'ri qolaveradi.

Nega bu bolaga qarz yozilmadi?

Odatda sabablardan biri: a'zolik hali sinovda, bola muzlatilgan, yoki guruhning tugash sanasi o'tib ketgan.

Oy o'rtasida qo'shilgan bolaga to'liq oylik yozildimi?

Yo'q. Faqat qolgan darslarga proporsional summa yoziladi.

Qarzni kechirsam bo'ladimi?

Ha — Moliya → Yechib olingan summalar da qarzni hisobdan chiqarasiz. U kassaga kirim bo'lib yozilmaydi, shunchaki qarz yopiladi.

Ota-ona parolini unutdi

Bola profilida ota-onaning login kodi ko'rinib turadi; rahbar parolni ham ko'ra oladi.

Bir bolani ikkita guruhga qo'sha olmayapman

Asosiy guruh bitta bo'ladi. Qo'shimcha mashg'ulotlar uchun to'garak yarating — ular cheklanmagan.

Yordam kerak

Telegram orqali yozing: t.me/gobi_support.